Chum tuet's am Morge afah tage

de ghört me d'Lüt scho wi sie chlage.

Oh nei, hani hüt viu z'tüe

so tönt es scho am Morge früeh.

Da hesch di öppe no verschlafe,

s'längt nid es mau meh für nes Gaffee,

der Chef dä wartet sicher scho,

wo si de d'Outoschlüssle häre cho?

Jtz aber hopp pressier e chli,

s'sött aus scho geschter fertig si,

es giit nid nume de Junge so,

o d'Rentner si betroffe dervo,

möchtsch iis ga zieh fragsch "chunsch o mit?"

de tönt es zrugg "ha gwüss ke Zyt".

Der Mönsch isch doch ke Apparat,

drum hie vo mier e chline Rat,

blib inisch chli am Wägrand stah,

s'mues nid geng aus im Tämpo gah,

gniess mau di stiui Aberueh,

los a me Lied vor Amsle zue,

gsehsch am Waudrand det di Reh?

Im gjufu hätsch die gwüss nid gseh,

sitz chli uf z'Bänkli vorem Huus,

lueg det im Haag e Hasumuus

u da chunnt no e Igumueter

uf der Suechi nach chli Fueter.

Es si doch grad die chline Sache,

wo z'Läbä läbeswärt tüe mache,

Z'neu Jahr isch ja scho gar nümm wyt

u für das wünsche ni euch e chli meh Zyt!

                                                  Vreni Hürst